愛丁堡詠春：功夫只不過自我感覺良好，有冇料唔重要

 某國嘅人有個特點，永遠唔會教足，留番幾手，唔到嗰頭近，都唔肯講出真相。問題係，到你嗰頭近嘅時候，你有冇充足體力及精神，去展示及解釋呢？中醫係咁，武術也是一樣。久而久之，每一代散失20%，幾代之後，就變成垃圾，三腳貓功夫。

詠春比較好彩，是秘密拳術，不是一指相傳，就是教得幾個，如果仲留幾手，肯定失傳，故較為足料，加上每一代宗師實踐改良，實力大增，加上秘密拳術嘅優勢，敵人無法知道招式奧妙，只要詠春拳手掌握「逢虛必冒進」，敵人往往短時間敗陣，詠春嘅威名也開始傳播。

然而傳統武術都有傳承問題，武功好，唔代表識教，尤其詠春屬於智慧型武術，唔係死練爛練可以成功，對師傅的教授能力、表達能力，成為一大挑戰，佢哋解釋唔到嘅現象，就往往用陰陽五行之類帶過，有的直頭解錯拳，當然有問題。

（又識打又識教嘅人唔多，「屍單」是少數在球員有出色表現，做教練又獲得出色成績。）

另外，在商品化嘅社會，詠春都係一個商品，問心嗰句，真係有師傅有料到要學十年，甚至一生追隨他嗎？如果冇料或冇咁足料，咪將一些貨，改頭換面，重新包裝去賣，有幾多真係有用，最重要是要你俾一世嘅錢，但徒弟唔係傻，長此下去，啲人會走晒，又要陰啲陰啲教你少少入門功夫，又可以蹉跎歲月了，至跟到個師傅拉柴，都學唔足料。

（師傅跟唔到一世，唯有自練，網傳周星馳可以打贏甄子丹，我相信是事實，因為師叔確曾下過苦功，黃公死後，也得到某師兄指點。）

俾你學足三套拳：小念頭、尋橋、標指，三器械：木人椿法、六點半棍、八斬刀。我好肯定咁話你知，你都唔識點打，如果你真係有料、又熱心追求，你明我意思。套路係冇教你點打，木人樁法嘅招式又好睇師傅有冇料，搬字過紙係冇意思，學費都收了，你學唔學到關人忍事。

係咁嘅條件，咁嘅質素，學詠春仲邊會有用？真係有用嘅招數，幾個月就可學晒，不過佢分幾年教你，你真係想學嘅，佢死都冇教你，唯有死後落陰間請教師祖五枚師太、嚴詠春、佛山贊先生梁贊，我講到咁，真係悲歌！

（所謂最正宗嘅，就最冇用。最唔正宗嘅，就最好打。觀眾最喜歡嘅，就最賺錢。作為商業世界，做人人喜歡嘅事，就最賺錢，所以師傅要賺錢，就唔係呼呼喝喝、嚴格要求，只要徒弟自我感覺良好，佢自己以為好勁，咪得囉！）

（龍哥生前想錄影宗師整套木人樁法，佢死都唔肯，到佢油盡燈枯，才肯露兩手，但已經力不從心，無法展示流暢精準嘅動作，一攤三伏要絕對埋肘也做不到，冇一個正確示範，又有甚麼用呢？）

IB投資系列：要留意債券、非美貨幣

 我地要知道，美帝加唔加息？減唔減息？唔係睇股巿，而係睇通脹率，如果佢堅持一定要將通脹率控制在2%，即使不再加息，也不代表立刻減息，九月減唔減到冇人知，今年減唔減冇人知，都係估估下。

如果一早知佢唔減，我使乜咁早沽貨，咁早還日圓，去槓桿化呢？人地贏層樓，我只係贏生活費，真係一個天、一個地，我又唔想掂虛擬貨幣，這些冇數計，可以被人一鋪清袋嘅東西，投資世界，高風險高回報，要穩陣，就唔好望一朝發達。

現時正值牛巿尾水，凡事都要小心，千萬不要眼紅人地賺大錢就摸頂入貨，十分危險，但可以炒到幾耐，真係冇人知，淨係講減息，由上年年尾講到宜家，邊個可以估得到呢？進取與否，全在乎你風險承擔程度，我都無謂阻人發達。

早前要留意嘅石油、黃金、虛擬貨幣，已經反映咗，不宜再沾手，見好就收。反而，非美貨幣、債券，要美帝減息才會升，現在可以留意，我知道這些東西吸引力係有限，非美貨幣如英鎊、歐元，利息比美元少，現在IB持有活期美元都有4.83%，債劵高嗰少少息，但有價格風險，其實唔值，但如果要等價格反映晒巿場價值，投資仲有甚麼意思？個價殘，因為唔值，正因為平，才有入巿價值。賺錢三法：息差、價差、槓桿，這是價差。

幾時係投資最佳時機？就係加息消息將加未加之前，就好像詠春拳術幾時係最佳反擊時機，係敵人攻擊將中未中之時，太早反應，對方會走，太遲反應，自己中招，唔係咁容易㗎！人地大行老細、基金佬，都已經跟「飽畏耳」唔知食咗幾多次飯，我地這些低級人種，憑甚麼攞第一手資訊？

（有些股票跌得好甘，自己執生！）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

快少少冇咗條命，有甚麼意思？

 最近在漁村發生交通意外，本田思域Type R FD2，車毁人亡，三人全部死晒。

屯門公路車速約70-80公里，這個轉彎路段有轉彎指示牌，示意司機減速，石壆與路面也有一個車位嘅緩衝位置，如果車速過快，轉向不足，最多是車側與石壆磨擦，要直接剷上石壆，令全車彈起，再撞向龍門架路牌，再跌出路壆外，車速要有番咁上下才會這樣。

我地深受日本文化影響，年青人財力有限，超跑就冇可能，本田、萬事得、掃把佬…都玩得過，不過愛車都唔係問題，但真係英雄無用武之地，我記憶以前故鄉，只有吐露港公路及北大嶼山公路行110公里，根本無辦法試到架車嘅真正實力，屯門公路表面係直路，實際係彎彎曲曲，四線又變三線，因以前想擴闊，但有些地方卻無辦法擴闊，古靈精怪，故設計成70-80公里，有實際原因，有測速相機嘅地方，大家都醒目收油，一過了就俾油去，如果唔太過份，都唔會有問題，但一旦超速過度，一般人就未必駕馭到架車。

如果真係要玩，北上都有一些賽車場，講人北上也很容易，滙率又好，飲飲食食…俾你快嗰少少，冇咗條命，有甚麼意思？

（冼拿死在賽車場，軍人死在戰場，都叫做有少少意思。為快少少而死，根本冇意義。）

「人 若 賺 得 全 世 界 ， 賠 上 自 己 的 生 命 ， 有 甚 麼 益 處 呢 ？ 人 還 能 拿 甚 麼 換 生 命 呢 ？」聖經 馬太福音16:26

IB投資系列：要任性都要有任性嘅本錢

 有些人係任性，係玩世不恭，但只要佢有任性嘅本錢，係冇問題嘅。

（如果上一代留下一大筆，任性係理所當然，至於品味問題，鹹魚青菜，各有所愛，都沒有可批評嘅地方。）

（有些人一年才開一次工，而每年個唱又有人睇，顯然這種玩法不長遠，因花無百日紅，加上那個年幾的人，不是移民，就是病死，只會越來越少。）

（要任性也要任性嘅本錢，你冇本事，怎能生咁多個，養咁多隻狗，仲要過物質嘅生活。）

我以前都曾認識一些朋友，未出糧以先，已計劃好點使錢，計到好盡，所以出糧一遲了，或有甚麼變數，就立刻周轉不靈，跟著又卡冚卡，又借財仔，又作故仔問人借錢，這些人最終冇晒朋友…

最離譜嘅，話冇錢嘅人，問你借錢嘅人，物質水準係我幾倍，大洗就係佢地嘅問題，但佢地永遠唔覺得需要降低生活水準，所以這些人係死有餘辜！

我早前已挑戰那些未黎過英國就多野講嘅人，39便士（約3.9港幣）涯一星期，睇下邊個涯得住？現在因通脹關係，最平嘅長方包要45便士，配合斷食，要維持一個人，可以用很少錢，但當然不能長期，要吃不同食物才有充足營養。

我想表達，大丈夫係能屈能伸，我初初出道，得一萬元人工，第一年每月7000元去中銀做零存整付，第二年加了人工每月8000元，我冇錢使，宿舍飯堂十蚊八蚊都慳，煮公仔麵便算，跟住已有廿萬在渣打做優先理財，其目的只不過我做訂期唔使排隊，真係無聊！

（有圖為証，沒有老吹，嗰時九厘，真係發達。之後輸晒係另一回事，如果有九厘根本唔使搏。）

冇錢嘅人係抵死，鄉講嘅失業率極低，你肯做，就有收入，我嗰個年代有人做兩份工，早一份，晚一份，夜晚做保安，有的是輪流休息，晚上有得唞一唞，但都極辛苦，這就是鄉講精神，獅子山下嘅精神。再唔係叫吳浩康介紹去地盤工作，老雜都兩皮，有牌三皮，大師傅四五皮（炒野做）。

（吳浩康以前形象極差，但人大了，識諗嘢，自力更新、能屈能伸，好野！）

錢唔會天跌落黎，就算投資，或者做生意，也需要本錢，你睇別人怎風光，背後被人奚落，你又知幾多？

（雖然有些人唔喜歡鄭威濤，但他確實有付出過，只不過做生意出了點手段，如果有錢齊齊賺，拍檔也不會反面，估唔到佢咁早死。）

「歪芺」成日話我唔做野，其實佢唔明睇資訊都係工作嘅一種，以色列跟伊朗真係大戰，石油價格會升。再者，姜太公、諸葛亮都唔係好吃懶做，而係裝備好自己，等待機會，所以投資也要有充足流動資金，等待機會。

（我會俾錢乞丐，但這些人，一個仙都唔會俾，有手有腳唔做野，係抵死，唔死都冇用。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

移英日記（149）長期療傷都唔係辦法

 許多人離鄉別井，去到地球另一邊，都有不同的故事。以前睇「尋找他鄉的故事」，鍾景輝King Sir嘅旁白，仍然在腦中。

以前故鄉立立亂，未有「各氨發」以先，眾教會也自我審查，講道含糊其詞，避免拉人封艇，大家冇運行，之後就更加不用說。

黎到自由國度，講道是切題了，針對會眾嘅需要及處境，開頭覺得好正，但年幾時間，仍然在療傷，好似有啲問題，長此下去，唔係辦法。但客觀場景，「鄉講人」跟故鄉仍有深厚聯系，亦會天天接收故鄉訊息，荒謬的事日日衝擊我們思維，情何以堪？正人日少、奸黨日多、忠良泯滅，好像讀歷史一樣，巿面一日比一日蕭條，點會冇感覺？真係可以離開了，就可以你死你事麼？

昨日去「魔域臣」超巿，碰見移英講人，我反應慢，一時未有反應，只是簡單打招乎便算，「歪芺」事後提我，正是牙醫一面之緣，兒子遇難嘅夫婦，不過即使我轉數快，都唔知同佢講乜嘢？移民對錯好難講，但如果黎到發生這樣嘅事，一定懷疑人生。

我地都冇謂想太多，部署下一代嘅將來，可能更重要，我地都過了大半世人，講句唔好聽都「嗰頭近」，仲可以點樣？

（這些人攞局長人工，做了甚麼？）

IB投資系列：現在係咪趁低吸納嘅時機？

 我查考以前層爛樓，足足跌了球半，我感謝某地government，令我們有決心。其實多年以前，已有一個想法，變賣層爛樓，提早去大馬退休。

只是要踏出這一步，何其困難，咁難得做了「有殼蝸牛」，要放棄並不容易，適逢大馬又吊高黎賣，將MM2H要求提高，月入八皮先好黎，泰國又言語不通又唔想去，一餐冬陰公當然開心，但餐餐又真係頂唔順，不了了之。

如果唔係某地government做到咁絕，點下到決心？我自問太小心，永遠唔係最平入貨，最貴沽貨，我預期美帝會減息，急急在1美元兌150日圓價位還晒，去槓桿化，點知「攣處焗」又唔減息，9月又唔知減唔減？年尾又唔知減唔減？試問天下仲有邊度嘅經濟比美帝強勁？長期高息，各國頂唔住，經濟也受影響，幣值也會下跌，現1美元兌154日圓，仲平咗，真係黐線！你永遠很難在最好價位沽貨，但那次賣樓卻做到了！多謝某地government。

所以「講股」蝕三十幾皮好少意思，樓如果現在才放蝕球半，再遲些跟「戴彎驅」睇齊。

（退位governor，仲有辦公室，有幾位職員、司機服侍，兩年出席700場活動，使了差不多成千萬，咁即係差不多日日有活動，飲飲食食點祝福「鄉講」？財赤仲咁倒水，咁有信心，我要多謝佢地，冇佢地下唔到決心。）

（由於美元強勢，有「攣系滙率」的「講幣」也強大，物價飛脹，紛紛外遊消費，商鋪執笠，持有商鋪嘅業主，寧可空鋪，也不肯減租，因減租會減鋪值，借「魔技」會Call窿，死都唔肯減，惡性循環，巿況日差，隨著與「戴彎驅」融合，幾年之內，人工、物價、租金也會與「戴彎驅」拉近或接近，自己執生喇！）

（個巿有幾旺？自己睇喇！現在係咪趁低吸納嘅時機？有人話四萬點哦，返去早唞發夢吧！）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

「三體」反思，停止不幸無限延續

 一切都源於不公平…

故事源自某地一場政治運動，有一群學生criticize自己嘅老師，科學家是否違返某主席嘅唯物辯證法？宇宙大爆炸暗示宇宙有開始，暗示有創造的神？與當時無神論違反？其實都不重要，點解可以煽動這班人如此瘋狂？其實是源於不公平。

地主、財主，其實即係有錢佬，點解可以剝削窮人？知識分子，點解可以站在高地指指點點？如果能夠將不公平打倒，重新建立秩序，多麼大快人心！

女主角葉文潔的父親遭criticize致死，而殺害其父親的Red Guards，最終也得到報應，因感染冇了一隻手，但仍然心生怨恨，不肯向葉文潔道歉，因為葉文潔有專業知識，即使係Black Five類，Country需要這些人材，待遇也比她好⋯⋯覺得不公平，不過對於葉文潔，又何嘗公平過？

人長期面對不公平，當這種情緒不住累積，當一有機會，便會作出激烈行動，Red Guards固然係，葉文潔也是一樣，最終她決定招惹外星人毁滅人類。

所有獨裁者，唔好講希特拉，睇睇某國嘅history，朱元璋殺嘅人，次次過萬，當中有無數無辜者，近代嘅，殺成近八千萬人也視之等閒，仲提議USSR引美軍主力進入國境，用核彈殲滅，連帶都係死四億國民（當時得六億人口），雖然最終沒有落實，但這些人的心思跟葉文潔引外星人毁滅人類有乜分別？

「幸運的人用童年治癒一生，不幸的人用一生治癒童年」，這個世代有幾多幸運嘅人？當不幸嘅人一有機會，就會報復，製造更多不幸，製造更多不幸嘅人，這個世界會變成點呢？

一個人會做出不幸嘅事，佢自己都係不幸嘅人，否則根本做不出，但係咪要這個不幸，無限延續呢？但願我們都能放下不幸，重建我地嘅社會。